Ácta sessiónis Mártis diéí 12 Februárí 2013

Hóc ménse, né quis impedírétur quóminus féstum diem Sánctí Valentíní celebráret, ínsolitá dié Mártis convénimus in popíná nostrá commodá et quiétá Alí-Bábá. Adfuérunt Canicus, Cordus, Maja, necnón nova nostra sodális Dawna úná cum fílió suó Caleb.

Magistró Canicó, lauté cénátí légimus et commentátí sumus Núntiós Latínós dié 20 Novembris 2012 recitátós quí tractábant Pápæ Benedictí XVI litterás apostolicás mótú proprió datás, quibus novam Pontificiam Académíam Latínitátis condébat. Hís Benedictí XVI verbís valdé assénsí sumus:

‘nostris quoque temporibus Latinæ linguæ et cultús cognitio perquam est necessaria ad fontes vestigandos, ex quibus complures disciplinæ ceteroqui hauriunt … Quapropter necessitas instare videtur ut linguæ Latinæ altius cognoscendæ ejusque congruenter utendæ fulciatur cura, sive in ecclesiali sive in patentiore cultús campo. Ut hic nisus extollatur et evulgetur, consentaneum prorsus est docendi rationes adhibere aptas ad novas condiciones et provehere item necessitudines inter academicas institutiones et inquisitores, ut copiosum ac multiforme Latini cultús patrimonium efferatur.’

Præstantés pró linguá Latíná Benedictí XVI nísús celebrávimus, in prímís novam académíam, hís ipsíus verbís conditam:

‘ad hæc proposita assequenda, Decessorum Nostrorum semitas calcantes, hasce per Litteras Apostolicas Motu Proprio datas hodie Pontificiam Academiam Latinitatis condimus.’

Úná cum auctórés Núntiórum Latínórum, Pontificiæ Académíæ Latínitátis omnia fausta félícia exoptávimus.

Ácta sessiónis Jovis diéí 10 Jánuárí 2013

Convénimus in solitá popíná Alí-Bábá hórá 6:30. Advénit prímus Cordus, deinde Canicus et Maja. Sodálem quoque novam lætí accépimus Dawnam. Necopínátus vénit etiam Joccus, cum amícá Jóhanná, quí á Finlandiá redux dissertátiónem illó ipsó dié défenderat. Nóbíscum júcundé cénávérunt, etsí ante fínem sessiónis fuit eís discédendum.

Magistrá Majá, légimus et commentátí sumus fábulam dé delphínó quí lítus Hippónénse frequentávit, á C. Plínió Cæcilió Secundó (Minóre) epistulá 9,33 ad Canínium narrátam, quam contulimus cum eís quæ dé delphínís scrípserat avunculus ejus C. Plínius Secundus (Major) in Nátúrális Historiæ 9,8-9.

Ácta sessiónis Jovis diéí 11 Octóbris 2012

Convénimus in solitá popíná Alí-Bábá hórá 6:30. Adfuérunt Avítus, Canicus, Maja, iterumque jam Júlia.

Á magistró désignátó dérelictí, prímum dé commúnitáte Latíná internátiónálí locútí sumus, necnón dé 26ª Septimáná Latíná Európæá (2-8 Sep) Frísingæ (prope Monacum) habitá, ubi Avítus nónnúllós Júliæ amícós víderat; deinde légimus et commentátí sumus P. Vergilí Marónis Ænéidis I, 76-127, ubi poéta procellam narrat quam Æolus Júnóní páréns solvit commótusque Neptúnus sentit.

Ácta sessiónis Jovis diéí 13 Septembris 2012

Convénimus in solitá popíná Alí-Bábá hórá 6:30. Adfuérunt Canicus, Jácóbus, Joccus, Maja.

Magistró Canicó, légimus et commentátí sumus P. Vergilí Marónis Ænéidis I, 1-49, ubi poéta deæ sævam in Ænéam suósque narrat Júnónis íram, ejusdemque frústrá cónátús né á Trojá perditá profugí in Latium perveniant condantque Rómam.

Jácóbum ob nuptiás núper celebrátás congrátulátí sumus. Joccó in patriam Finniam mox reditúró tríste valé díximus.

Ácta sessiónis Jovis diéí 9 Augustí 2012

Convénimus in solitá popíná Alí-Bábá hórá 6:30. Príma advénerat Francisca, quam Maja et pauló post Jácóbus et dénique Avítus invénit ibi. Morá quádam vénit etiam Hugó, quem bicyclum déstituerat.

Magistró Avító, æstívá hác sessióne locútí sumus prímum dé fériís déque annó proximó. Maja Aprílí fériás habuerat. Jácóbus aliquot diés núperius égerat rúrí in tabernáculó. Francisca amícós víserat. Avítus nóndum vacáverat, sed cónstituerat jam Frísingam (Monacum) petere ut 26ª Septimáná Latíná Európæá (2-8 Sep) adesset. Commendáta est quoque Schola Latína Úniversális, quæ initium faciet nóní ejus vítæ anní académicí proximó 17 Septembris 2012. Locútí sumus etiam dé Féstó Músicæ Antíquæ Brighton ménsibus Octóbre Novembre habendó, ubi Maja nostra canet. Longum colloquium habuimus posteá dé somniís, hujus sessiónis máteriá. Disseruimus dé rhythmís circádiánís et dé úníuscujusque maximé assiduís somniís, sententiís nostrís super eórum significátióne, necnón artibus quó melius memoriá tenérentur vel etiam cónscientia fovérétur dum somniátur, somniís lúcidís et pelliculá Inception.

Post cénam légimus et commentátí sumus Aur. Macrobí Ambrosí Theodosí Commentárí ex Ciceróne in somnium Scípiónis librum prímum, caput tertium, quó auctor autumat «Quínque esse genera somniandí, atque somnium hoc Scípiónis ad príma tria genera débére referrí». Macrobí cónfúsa genera déclárávimus: somnium, óráculum, vísiónem, ínsomnium, [ephialtam,] vísum. Multa didicimus etiam dé ipsíus Cicerónis narrátióne (Rép. 6,8-29), necnón dé Platónis fábulá Éris (R. 10,614a-621d). In fíne vídimus in télevísióne certámen cursús quó Usain Bolt aurum vícit in 200 metrís in Olympiís, bonóque discessimus animó.