Ácta sessiónis Lúnæ diéí 12 Septembris 2016

Convénimus dié Lúnæ 12 Septembris 2016 in domó publicó ‘Truckles of Pied Bull Yard’ in Bury Place hórá 18.30.  Advénérunt Maja, Cordus, Davidus F et Avítus, núperrimé ab Indiá regressus.  Márcus ultimó momentó veníre nón potuit.  Majá magistrá, dum cénámus, légimus et discussimus Horátií Flaccí carmen 8 ex Sermónum libró prímó, in quó effigiés deí Priápí fábulam comicam narrat.

Proxima sessió erit dié Lúnæ 10 Octóbris dé quá plúra publicé et in sitú et per epistulás électronicás nuntiábuntur.  Ínfélíciter, magister nóndum cónstituí potest; sed Maja nuntium omnibus mittet.  Quí nóbiscum illó dié conveníre velint, ad Majam tunc rescríbant.

Admonitió: sessió ménsis Novembris dié Mercurií 9 Novembris fiet, magistró Cordó.  Ménse Decembris ad diem Lúnæ revertémus; díximus diem 5 Decembris.

Ácta sessiónis Lúnæ diéí 15 Augustí 2016

Convénimus dié Lúnæ 15 Augustí 2016 in domó publicó ‘Truckles of Pied Bull Yard’ in Bury Place horá 18:30.  Advénérunt Maja, Cordus, Davidus H, Márcus S, et cónsodális novus Davidus F, quem læté accépimus.  Advénit quoque Alfónsus, cónsodális Circulí Latíní Matriténsis, quí Londinium vísitábat.  Lætissimé accépimus, et per eum cónsodálés CLM salútávimus.  Canicus, Ludovícus et Avítus anteá sé excusáverant.

Majá magistrá, dum cénámus, légimus et discussimus versús quósdam dé tempore vernálí et dé vínó, ab auctóribus incertís mediæ ætátis scriptós.  Légimus quoque versús illós nótissimós ab Archipoétá Colóniæ scriptós, inter quós ‘meum est própositum in taberná moró’ ut in opere Carmina Burána Carolí Orff cantantur.

Proxima sessio erit dié Lúnæ 12 Septembris, dé quá plúra publicé et in sitú et per epistulás électronicás núntiábuntur.  Ínfélíciter, magister nóndum cónstituí potest, sed Cordus núntium omnibus mittet.  Quí nóbiscum illó dié conveníre velint, ad Cordum réscríbant.

Ácta sessiónis Lúnæ diéí 14 Septembris 2015 magistró Canicó

Convénimus dié Lunæ 14 Septembris 2015 in domó publicó ‘Truckles of Pied Bull Yard’ in Bury Place horá 18.30. Advénérunt Maja, Canicus, Cordus, Jacóbus, Márcus T Brasiliénsis, Márcus S Ítalus. Advénerunt quoque Petrus ex Ítaliá, quí nónnumquam Londinium vísitat et duó cónsodálés noví, Anna ex Poloniá et Timotheus D, quós omnés læte accépimus. Avítus, Davidus et Robínus anteá sé excusávérant.

Canicó magistró, légimus et discussimus nónnullás M. Valerí Mártiális ‘núgás’ (sí ita dícámus) quás dé suís poematís dívulgandís scripsit.

Proxima sessió erit dié Lúnæ 12 Octóbris, magistró Marcó T, dé quá plúrá publicé et in sitú et per epistulás électronicás nuntiábuntur.

Ácta sessiónis Lúnæ diéí 10 Augustí 2015 magistrá Majá

Convénimus dié Lunæ 10 Augusti 2015 in domó publicó ‘Truckles of Pied Bull Yard’ in Bury Place horá 18.30.  Advénérunt Maja, Cordus, Jacóbus, Avítus, Ludovicus, Marcus T Brasiliensis, Marcus S Italicus, Timotheus, Davidus.  Laete accepimus consodalem novum Danielus.  Canicus et Robinus antea se excusaverant.

Majá magistrá, dum cenámus légimus et discússimus versús aliquantulós a Catúllo Martiáleque scriptos et epitaphia ab auctóre scripta notissimo fecundissimoque ‘Anonymo’.  Collóquium quoque líberum habebamus et dies diximus sessionum aliarum hujus anni.  De magistratu sessionum egimus: volumus ut plures officia suscipiant ne tribus oneratiora fiant.  Omnibus consilium bonum visum est.  Promiserunt omnes se de re cogitaturos esse.

Proxima sessio erit die Lunae 14 Septembris, magistró (ut credimus) Canicó, de quá plura publicé et in sitú et per epistulas electronicas nuntiabuntur.

Ácta sessiónis Jovis diéí 19 Júlí 2014 magistrá Majá

Convénimus dié Jovis 19 Juli 2014 in domó publicó ‘Truckles of Pied Bull Yard’ in Bury Place horá 18.30. Advénérunt Maja, Cordus, Jacóbus et Dominicus. Avítus se excusaverat quia necesse erat omnia parare ad migrandum. Canicus quoque se excusaverat: in Italiá erat.

Majá magistrá, dum cenámus légimus epistolas aliquas a C Plinio Secundo (Minore) scriptas de otio, de recitationibus poeticis et de ludis Circensibus. Inter nos colloquium postea habebamus de ludis Olympicis. Rogabamus quomodo optime otium nunc gerendum sit, et num Plinius, si temporibus nostris vixisset, in eisdem mansisset sententiis ac in epistulis scripsisset.

De sessione mensis Augusti dubitabamus, et credebamus nos mense Septembri sessionem proximam habitúros esse, magistro vel Canico vel Jacóbo.

Ácta sessiónis Jovis diéí 13 Mártí 2014 magistrá Majá

Convénimus dié Jovis 13 Martis 2014 in domó publicó ‘Truckles of Pied Bull Yard’ in Bury Place horá 18.30. Advénerunt primi Maja Canicusque, et postea Robinus, Dominicus atque Jacóbus. Cordus ultimó momentó propter labórem advenire non potuit et se excusávit. Dum cenámus, magistrá Majá, légimus atque discutimus caput xxviii ‘Vitae Sancti Columbæ’ in quo de bestiá aquatíli lacús Nesiani scripsit Adamnan, et postea versús illos Libri V ‘De Rerum Naturá’ Titi Lucreti Cari in quibus Lucretius de Chimaerá Centauribusque scripsit, et in quo explicávit cur non fieri potuissent. De carmine quoque Lactanti ‘De Ave Phoenice’ paulisper collocúti sumus. Dominicus libros aliquos de dracónibus apportaverat, quos inspeximus.

Ácta sessiónis Jovis dieí 13 Februárí 2014 magistró Canicó

In domó publicá ‘Truckles of Pied Bull Yard’ hórá 18.30 prímum convénímus Canicus et Maja. Postea mox advénérunt Robínus et Avítus et tandem Cordus, receptáculum purgámentórum imménsum portans quod nuperrime émerat, et dé quó hilariter et jocósé locutí sumus. Dum cénámus, multís dé rébus sermónem habébámus; tandem magistró Canicó aliquid légimus ab Ovidió scriptum (Amores III, 2).

Ácta sessiónis Jovis diéí 12 Septembris 2013

Convénimus in domó publicá The Harcourt Arms hórá 6:30. Maja, Jácóbus, Canicus et á Calédoniá Avítí amící duo vénérunt. Avítus ipse ultimó mómentó veníre nón potuit.

Magistró Jácóbó, fábulam dé Orpheó Eurydicéque légimus ab Ovidió scríptam (Met. 10,1-85) in quá Orpheus uxórem Eurydicem á Plútóne petívit. Dé trístitiá Orpheí locútí sumus et dé fortitúdine ejus cum ad ínferós déscendit.

Ácta sessiónis Jovis diéí 9 Mají 2013

Convénimus in domó publicá The Harcourt Arms, hórá 6:30. Adfuérunt Canicus, Jácóbus, Maja. Robertus quoque iterum vénit, magnóque cum gaudió accépimus sodálem novam, Chrístínam, a Jácóbó invítátam.

Magistrá Majá, postquam cénávimus et dé multís variísque rébus júcundissimé locútí sumus, légimus Q. Horátí Flaccí Sermónum 2,6. Disputávimus num temporibus nostrís víta rústica eadem ac temporibus Rómánórum esset. Quæstió nóbís in mentem vénit num víta rústica nunc melior sit quam víta urbána. Cónstábat inter omnés vítam rústicam nunc juvenibus núlló modó semper placére. Multís dé aliís rébus locútí sumus, inter quæ dé medicíná et dé linguá Latíná temporum mediæválium.

Ácta sessiónis Jovis diéí 11 Aprílis 2013

Convénimus in domó publicá The Harcourt Arms hórá 6:30. Adfuérunt Anna, Avítus, Dawna, Jácóbus, Maja. Etiam duás novás sodálés magnó cum gaudió accépimus, Carolottam et Ráchélem, quæ in úniversitátem annó proximó ingredientur.

Magistró Jácóbó, locútí sumus inter alia dé nová Expositióne Pompejáná in Múséó Britannicó. Posteá cénávimus et dé Sermóne quíntó librí prímí Q. Horátí Flaccí collocútí sumus. Mírátí sumus, exemplí grátiá, difficultátés itineris in Sermóne dépictás: meditátí sumus aquam déterrimam, cúlínam quæ ársit, rixam inter viátórés, et návem frequentissimam. Locútí sumus quoque dé vócibus animálium et de ænigmatibus quibusdam Sermónis.