Dé cénsú Latíná: ácta sessiónis Júniæ 2017

Convénimus dié Mártis 6 Júní 2017 in domó publicó ‘Truckles of Pied Bull Yard’ in Bury Place hórá 18:30.  Advénérunt Avítus, Cordus, Maja, Márcus S, necnón hospita acceptissima Æmilia quæ in Collégió Úniversitátis Londiniénse docet (sícut Avítus noster) et Latíné loquí prímum apud nós cónáta est.

Cordus, Maja, Márcus S, Æmilia, Avítus in Circulí sessióne Júniá 2017 in domó publicó 'Truckles'.
Cordus, Maja, Márcus S, Æmilia, Avítus.

Cordó magistró locútí sumus dé cénsú Latínó et libelló Edvardí Engelsingí illá dé ré.  Edvardus cum Úniversitáte Vasintóniæ Occidentális prímum cénsum Latíné adhibentórum annó 2009 fécit, postquam Avítus noster tálem rem próposuit annó 2004.  Libellus frúctús expónit illíus cénsús et mentiónem fécit noví cénsús agendí hóc annó.

Mulierum paucitátem inter respondentés discussimus; cónsíderávimus num véró exstat ‘commúnitás Latína’; dé proximó cénsú et quæstiónibus própositís locútí sumus.

Ceterum mentiónem fécimus Circulí Latíní Faliscí á Canicó nostró nuper conditó, et aliórum circulórum Latínórum quí Facebook et Twitter útantur, et nós rogávimus num hóc facere debeámus.  (Quid cénsétis, lectórés?)

Ácta sessiónis Mártis diéí 7 Februárí 2017

Convénimus dié Mártis 7 Februárí 2017 in domó publicó ‘Truckles of Pied Bull Yard’ in Bury Place hórá 18:30.  Advénérunt Maja, Cordus, Márcus et Rachel M.  Avítus et Davidus F anteá sé excúsáverant.

Cordó magistró, légimus et discussimus libellós Anglicé scriptós ‘Latin behind bars’ et ‘How to be a good classicist under a bad emperor’.  Fassí sumus linguam Latínam litterásque húmániórés sæpe laudárí adhibérí (etiamsí nón bene intellegí) ab fascium partibus et aliís quí imperiórum propágátiónem favent et Júdæós Muhammedánós mulierés aliénigenás ódérunt.  Tálés hominés hís diébus plúrés atque valentiórés videntur.   Pléríque Latíné loquentés virí candidí sunt.  Circulus Londiniénsis mulierés viríque sumus, et nónnullí advenæ, sed candidí omnés.

Cónsentívimus igitur nós odium obstáre et sodálitátem hominibus porrigere quós odit fascium pars.  Nón certé scimus quómodo hoc agendum sit; professió tamen initium est.

Ácta sessiónis Mercurí diéí 9 Novembris 2016

Convénimus dié Mercurí 9 Novembris 2016 in domó publicó ‘Truckles of Pied Bull Yard’ in Bury Place hórá 18:30.  Némó adesse potuit præter Cordus Avítumque, quí colloquium júcundissimum habuérunt dé labóre, amóre, studiís, Circuló nostró, caupóná ‘Black Cap’ (quæ hís diébus clausa est sed quæ Cordus inter aliós vult redintegráre), multís aliís rébus.

Ácta sessiónis Lúnæ diéí 9 Februárí 2015 magistrá Majá

Convénimus dié Lúnæ 9 Feb 2015 in domó publicó ‘Truckles of Pied Bull Yard’ in Bury Place horá 18.30. Advénérunt Maja, Canicus, Cordus, Jacóbus. Advénit quoque cónsodális novus Miló Alemannus, quem lætí accépimus. Robínus anteá sé excusáverat, ut quoque duo cónsodálés noví futúrí, Márcus et Petrus. Avítus in Indiá erit usque ad ménsem Majæ.

Majá magistrá, dum cénámus légimus et discússimus epistolás Cicerónis ad Atticum XIII.52 et XIV.4; príma dé céná quádam in quá hospes fuerat C. Július Cæsar – quí sé exercitumque invítáverat; altera post cæde Cæsáris scripta erat. Posteá, sermónés habébámus váriós, et Jacóbus nóbís mónstrávit nuntium dé Circuló in UCL positúrum.

Diem sessiónis ménsis Mártis diximus; diés Lúnæ 9 Mártis (magistró Canicó) omnibus convénit, dé quá plura publicé et in sitú et per epistulás électronicás nuntiábuntur.

Ácta sessiónis Mártis diéí 27 Septembris 2011

Sessiónem extraórdináriam in Truckles of Pied Bull Yard prope Múséum Britannicum habuimus, hórá quidem solitá feré 6:00 sed postulante BBC, quæ meditábátur segmentum inclúdere in futúrá émissióne programmatis «The One Show». Adfuérunt Avítus, Canicus, Jácóbus, Joccus et Maja.

Nónnúllás hórás ibi égimus, dum varia disserimus monente Halina Kierkuc, quæ etiam colloquium cum Avító sóló in fíne habuit. Dénique programma ubi Latínitás tractábátur fuit «The One Show» Jovis diéí 20/10/2011, quod émísit BBC One hórá 7:00pm atque inveniébátur in iPlayer usque ad 7:29pm Jovis diéí 27/10/2011. Dé Latínitáte áctum est inter minúta 8:03 et 16:06, atque Circulus Latínus Londiniénsis appáruit inter minúta 11:59 et 12:30.