Ácta sessiónis Jovis diéí 12 Júní 2014 magistró Jácóbó

Sessiónem extraórdináriam in Turcicá popíná Tas prope Múséum Britannicum habuimus, hórá quidem nón ínsolitá 6:30, ut ultimam sessiónem cénamque valédictóriam celebrárémus cum Avító, in Indiam proximó ménse migrátúró. Adfuérunt Avítus, Cordus, Jácóbus, Maja.

Magistró Jácóbó, vóta nostra in chartulá scrípserámus quam Avító trádidimus, ubi inerant etiam Canicí vóta, quí adesse nón poterat sed per Majam míserat. Inter optimam cénam colloquiumque spontáneum, locútí sumus dé præsentí atque futúró Latínæ doctrínæ in Britanniá, dé Melissá, dé Scholá Latíná Európæá & Úniversálí et dé methodís linguæ Latínæ; inde inquísívimus dé linguá litterísque Indicís déque Avítí própositís futúrís. Sessió itaque et trístis et hilara fuit.

Ácta sessiónis Jovis diéí 13 Júní 2013

Sessiónem quádantenus extraórdináriam in Collégió Úniversitátis Londiniénsis habuimus, hórá quidem solitá 6:30, in aulá nóbís reservátá. Adfuérunt Avítus, Cordus, Maja, necnón novus sodális Dominicus.

Magistró Avító, cónsíderávimus linguæ Latínæ in scholís futúrum. Habendum enim Veneris dié 14 Júní in Múséó Britannicó erat colloquium «Does Latin have a future? A debate examining Latin’s place in the classroom and broader culture», quó nónúllí adfutúrí erámus; placuitque dé hác pertinentissimá ré sententiás Latíné loquentium eó própositó commúnicáre. Spectávimus ergo prímum á Majá commendátam bene nótæ societátis beneficæ «Classics for All» plénam spé pelliculam, légimusque etiam nón tam exhilarantem articulum Gáí Licoppe «Deceptus Gymnasio», Melissa 174 (2013) 1.

Omnés celebrávimus cultús classicí doctrínam in scholís Britannicis et jam passim flórére et amplius esse destinátam ut flóréret, cum vernáculó quidem sermóne adhibitó nón jam tantum Rómánórum antíquum cultum magnó émolumentó possint discipulí discere, sed etiam Græcórum, Indórum, Sínórum céterórumque omnium, quod in mundó globálizató pláné pertinet ad húmánitátem tótam amplectendam. Némó quoque putábat linguam Latínam reápse posse umquam ab Úniversitáte éliminárí, cum serventur ibi etiam multó obscúrióra studia sícut Mesopotamica vel Ægyptiaca magnó sine discrímine.

Dé linguá autem Latíná in scholís ipsís amplius servandá, dé quá ré agébátur, minus erámus certí. In scholís enim ubi doctrína linguæ Latínæ est rés nova feréque ígnóta, magis magisque postulátur; at in scholís ubi linguæ Latínæ docendæ aliquí jam sit mós atque experientia, discipulí ódérunt plérumque linguam parentésque oppugnant. Nostrá quidem sententiá doctrina linguæ Latínæ défendí solet argumentís quæ dénique persuádére nón valent, quia nón proprié ad linguam Latínam sed etiam ad plúrés aliás máteriás pertinent. Analyticam vidélicet fórmam mentis nón sólum lingua Latína potest docére, sed etiam physica vel moderna geógraphia; grammaticam nón sólum Latína, sed etiam Germánica lingua vel Russica. Cum parentibus décernendum est, nón vident cúr débeant éligere linguam mortuam ante aliás máteriás quæ eísdem prórsus facultátibus fíliós suós dónáre possunt. Vix tamen quisquam perspicere vidétur quid sit linguæ Latínæ specificum, quod jústificet præsentiam ejus in curriculó Britannicæ éducátiónis: nempe linguam Latínam nón esse tantum linguam alicujus societátis remótæ, longé præteritæ atque obsolétæ, sícut antíquorum Rómánórum, Græcórum, Ægyptiórum; sed etiam linguam quæ ad patrimonium Britannicum penitus pertinet sícut ipse Shakespeare! Eá de causá lingua Latína débet docérí multó potius quam Græca vel Ægyptiaca vel Samskrta! Quia lingua Latína neque aliæ est lingua nón alteríus gentis peregrínæ sed ipsórum nostra! Quid rérum est magis Britannicum quam fábula régis Artúrí vatisque Merlíní? Et est linguá Latíná nóbís trádita, non Anglicá! Quid magis ínsigne quam Magna Carta? Et est Latína! Quid magis Britannicum quam philosophia Baconí vel scientia Newtoní? Et sunt Latíná linguá tótó orbí propaláta! Quid magis quam ipsæ nostræ líbræ quás omnés in sinú portámus? Et habent ínscríptiónem linguá Latiná exarátam usque ad hodiernum diem! Cum linguam Latínam efficimus tantum linguam cujusdam gentis antíquæ atque á nóbís remotæ, prímam præcipuamque causam cur ea lingua mánserit in ínstitútióne usque ad nostrum tempus oblitterámus, ejusque linguæ pertinentiam reddimus inintelligibilem omnibus nostrís cívibus, nostrís discipulís eórundemque parentibus! Multi ódérunt linguam Latínam nón tantum quia nón sentiant ejus pertientiam ad altissimum maximéque genuínum patrimonium nostrum Britannicum, sed quia id quamquam ígnórantes cónátí sunt quidem discere et nón paucós post annós nihil didicérunt. Ínstitútiónem Latínam jam Refórmare cónátus est ARLT conditor WHD Rouse. Methodus dírécta quam ille propugnábat in omnibus aliís linguís optimós dedit fructús et nunc passim adhibétur. Ad linguam Latínam docendam non potuit succédere quia némó docet magistrós Latíné loquí; et quí Latíné loqui nescit, is methodum díréctam adhibére nón potest. Quæ sit optima methodus jam dúdum scímus, et hoc démónstrátum est in omnibus linguís (Latíná inclúsá); at quí eam methodum adhibeant nón ínstituere volumus. Omnés magistrí linguæ Latínæ sciunt jam omnia necessária ut Latíné volubiliter loquantur, sícut jam multí iterant, dummodo experimentum facerent. Professórés véró nón eós stimulant ut cónentur, sed omnibus dissuádent víribus! Sine methodó communicátívá, discipulí vel etiam multós post annós dé cultú quidem classicó multa, linguam véró ipsam legendam non reápse discent. Parentés ergó, ipsíque discipulí adultí factí, útilitátem ultimam illíus reí pergent nón intellegere pergentque oppugnáre linguæ Latínæ doctrínam. Hæc itaque videbantur quidem esse sententiæ nostræ.

Post duás hórás hárum déliberátiónum fínem fécimus profectíque sumus. In viá de historiá pronuntiationis sermónis Anglici linguæque in Angliá Latinæ adhúc sumus locútí. Exinde, Dominicó valé dícere débuimus. Hórá autem jam feré 9:00 popínam quandam Cypriam ingressí, júcundissimam cénam inter ulterióra colloquia de vítá studiísque nostrís tránségimus reliquí.

Ácta sessiónis Jovis diéí 14 Mártí 2013

Convénimus in Suéticá domó publicá The Harcourt Arms, hórá 6:30. Adfuérunt Avítus, Canicus, Cordus, Dawna, Jácóbus et Maja, necnón novus sodális Robertus.

Magister Cordus computátrícem suam dum frustrá Wi-Fi cónectere cónátur, reliquí sodálés líberé collocútí sumus.  Deinde, computátríce abditá, varia exemplária operis Clément Desessard, Lingua Latína sine molestiá, ínspeximus, dé Scholá Latíná Európæá & Úniversálí disseruimus, et Gaudeámus igitur cecinimus (vel potius canere cónátí sumus!).

Ácta sessiónis Jovis diéí 12 Júlí 2012

Convénimus in solitá popíná Alí-Bábá hórá 6:00. Prímæ advénerant Maja novaque sodális Júlia, quás invénit deinde Avítus majóre quam solet morá.

Á Jácóbó convocátí, quí tamen in Collégí Régí Scholá Æstívá Græcé cum docéret nón potuerat adesse, colloquium júcundissimum habuimus multís dé rébus: prímum, quó melius inter nós cógnóscerémus, Júliæ dé nóbís sodálibusque absentibus rettulimus nónnúlla, eamque dé sé interrogávimus, quam comperimus esse Germánam apud Úniversitátem Bristoliénsem mathématicam et in arithméticam incumbentem, neque eó minus míré Latíné disertam; deinde dé commúnitáte Latíná internátiónálí locútí sumus, necnón dé sémináriís Latínís annís præteritís celebrátís quibus nónnúllís Avítus et Júlia úná interfuerant; exinde dé hominibus Latíné loquendí cupidís in Britanniá; dénique véró dé linguá Latíná docendá atque discendá in scholís et úniversitátibus Britannicís.

Légimus in fíne Crístophorí Columbí, Óceanicæ Classis Præfectí Hispánicæ, prímás litterás, ut tunc putábátur, Dé ínsulís núper in marí Indicó repertís, quás Olisíbóne prídié Ídús Mártiás 1493 pulchrá Hispánitáte cónscríptás in minus bonam Latínitátem verterat Aliander dé Cosco quídam a.d. III. Kalendás Majás. Avítus attulerat Hispánicum archetypum, ubi nónnúlla dubia comprobáre potuimus.

Ácta sessiónis Lúnæ diéí 23 Mártí 2009

Sessiónem quádantenus extraórdináriam in Collégió Úniversitátis Londiniénsis habuimus, hórá quidem solitá 6:00 sed in aulá quam nóbís UCL Language Centre reserváverat. Asturem ac Cordum in prope sitá domó publicá The Marlborough Arms pauló ante sessiónem jam expectantés invénit Avítus, quibuscum in aulam tránsiérunt ideó apparátam. Illíc expectábat jam Jacóbus. Vénit et Evan nón multó post.

Magistró Avító, locútí sumus prímum dé methodís linguæ Latinæ, inter quás præstant ad auctórés classicós volúbiliter legendós Hans H. ØRBERG, Lingua Latína per sé illústráta (cujus auctam colórátamque versiónem édidérunt núper Italí), atque ad úsum nostrí temporis aptiórés Clément DESESSARD, Lingua Latína sine molestiá, necnón Robert MAIER & all., Piper Salvé: Cursus Vívæ Latínitátis. Spectávimus exinde pelliculam La via degli umanisti, quæ úsum scholasticum suprá laudátæ methodí Ørbergiánæ optimé multimodísque démónstrat. Locútí sumus dénique dé societátibus Latínís atque æstívís sémináriís ad quæ frequentanda invítávit omnés Avítus.

Hórá tandem 8:00 in domum publicam The Marlborough Arms nós dénuó cóntulimus, ubí profectó nihilóminus Asture júcundissimam cénam inter ulteriora colloquia tránségimus reliquí.

Ácta sessiónis Sólis diéí 8 Mártí 2009

Conventum est in caupónam déversórí Chamberlain Hotel hórá 2:00. Adfuérunt Anna, Avítus, Cordus, Evan, necnón nova sodális Laura.

Evan duce, in prímá parte légérunt ac retractávérunt Johannis Amos Comení Jánuam linguárum reserátam. In secundá parte líberum factum est colloquium Latínum. In tertiá parte locútí sunt Anglicé.