Ácta sessiónis Mártis diéí 9 Májí 2017

Convénimus dié Mártis 9 Májí 2017 in domó publicó ‘Truckles of Pied Bull Yard’ in Bury Place hórá 18.30.  Advénérunt Avítus, Maja, Márcus S, Maria et Jácóbus Pistor, quí é regióne septentriónális Britanniæ Londinium vénerat.  Cordus et Olívárius anteá sé excusávérant.  Majá magistrá, dum cénámus, légimus et discussimus excerpta dé vítá Fúrií Camillí á Titó Lívió scriptá, præsertim dé magistró lúdí scelestó quí puerós Faliscós Rómánís trádere cónátus est.  Ínspeximus quoque imáginés quásdam á Jácóbó-Ludovícó Davidó annís 1789 -1792 pinctás quæ ad historiás reípublicæ Rómánæ pertinébant, ut dé significátióne fábulárum dé heroïbus discuterémus.

Proxima sessió erit dié Mártis 6 Júní, magistró Cordó, dé quá plúra publicé et in sitú et per epistulás électronicás nuntiábuntur.

Ácta sessiónis Lúnæ diéí 9 Májí 2016

Convénimus dié Lúnæ 9 Májí 2016 in domó publicó ‘Truckles of Pied Bull Yard’ in Bury Place horá 18:30.  Advénérunt Canicus, Cordus, Maja et Márcus S.  Avítus, Ludovícus et cónsodális novus Nikolaus anteá sé excúsáverant.  Ludovícus congressum Oxónií in Úniversitáte parábat dé Accadémíá Vívárium Novum.  Nikolaus ad congressum simile Cantabrigiam ad Úniversitátem ierat.

Majá magistrá, dum cénámus, légimus et discussimus excerpta ex epistulís Plíní Minóris dé Réguló scríptís, in quibus multa contrá Régulum scrípsit.  Dé morte fílií Régulí quoque scrípsit Plínius, quamobrem légimus versús á Mártiále scríptós dé hóc pueró.

Proxima sessió erit dié Lúnæ 6 Júní, magistró Canicó, dé quá plúra públicé et in sitú et per epistulás électronicás núntiábuntur.

Ácta sessiónis Lúnæ diéí 1 Februárí 2016

Convénimus dié Lúnæ 1 Februárí 2016 in domó publicó ‘Truckles of Pied Bull Yard’ in Bury Place hórá 18.30.  Advénérunt Canicus, Davidus, Maja et Marcus S.  Avítus, Cordus, Johannes, Ludovicus et Robinus anteá sé excusáverant.

Canicó magistró, dum cénámus, légimus et discussimus órátiónem Calgací á Tacitó in libró ‘Agricola’ scriptam (Cap XXIX – XXXII).

Proxima sessio erit dié Lúnæ 7 Mártis, Cordó magistró, dé quá plura publicé et in sitú et per epistulás électronicás á Cordó núntiábitur.

Ácta sessiónis Lúnæ diéí 13 Aprílis 2015 magistrá Majá

Convénimus dié Lunæ  13 Aprilis 2015 in domó publicó ‘Truckles of Pied Bull Yard’ in Bury Place horá 18.30. Advénérunt Maja, Cordus, Jacóbus, Davidus, Timotheus, Carlotta.  Advénit quoque consodalis novus Marcus Tindo, quem læti accépimus.  Robinus, Canicus, Marcus S, Avitus antea  se excusaverant.

Majá magistrá, légimus epistolam a Desiderio Erasmo Roterodamo  scriptam de pueris Regis Henrici Septimo, et in primis de puero qui postea rex factus est Henricus Octavus. Regem puerosque regales visitaverat cum Thomá Moro.  Legimus quoque ea quae scripsit Erasmus de naturá Mori.  Sermónes ante et post cenam habebamus  vários, de nobis et de fabulá Wolf Hall nuperrimé per televisionem emissá.

Proxima sessio erit die Lunae 18 Majae, magistris Jacobo Timotheoque, de quá plura publicé et in sitú et per epistulas electronicas nuntiabuntur.

Ácta sessiónis Lúnæ diéí 9 Februárí 2015 magistrá Majá

Convénimus dié Lúnæ 9 Feb 2015 in domó publicó ‘Truckles of Pied Bull Yard’ in Bury Place horá 18.30. Advénérunt Maja, Canicus, Cordus, Jacóbus. Advénit quoque cónsodális novus Miló Alemannus, quem lætí accépimus. Robínus anteá sé excusáverat, ut quoque duo cónsodálés noví futúrí, Márcus et Petrus. Avítus in Indiá erit usque ad ménsem Majæ.

Majá magistrá, dum cénámus légimus et discússimus epistolás Cicerónis ad Atticum XIII.52 et XIV.4; príma dé céná quádam in quá hospes fuerat C. Július Cæsar – quí sé exercitumque invítáverat; altera post cæde Cæsáris scripta erat. Posteá, sermónés habébámus váriós, et Jacóbus nóbís mónstrávit nuntium dé Circuló in UCL positúrum.

Diem sessiónis ménsis Mártis diximus; diés Lúnæ 9 Mártis (magistró Canicó) omnibus convénit, dé quá plura publicé et in sitú et per epistulás électronicás nuntiábuntur.

Ácta sessiónis Jovis diéí 19 Júlí 2014 magistrá Majá

Convénimus dié Jovis 19 Juli 2014 in domó publicó ‘Truckles of Pied Bull Yard’ in Bury Place horá 18.30. Advénérunt Maja, Cordus, Jacóbus et Dominicus. Avítus se excusaverat quia necesse erat omnia parare ad migrandum. Canicus quoque se excusaverat: in Italiá erat.

Majá magistrá, dum cenámus légimus epistolas aliquas a C Plinio Secundo (Minore) scriptas de otio, de recitationibus poeticis et de ludis Circensibus. Inter nos colloquium postea habebamus de ludis Olympicis. Rogabamus quomodo optime otium nunc gerendum sit, et num Plinius, si temporibus nostris vixisset, in eisdem mansisset sententiis ac in epistulis scripsisset.

De sessione mensis Augusti dubitabamus, et credebamus nos mense Septembri sessionem proximam habitúros esse, magistro vel Canico vel Jacóbo.

Ácta sessiónis Jovis dieí 14 Novembris 2013 magistrá Majá

Convénimus in domó publicá The Harcourt Arms hórá 6:30. Maja Dominicusque primi advénerunt, et postea advénit Robinus, qui paucis mensibus nobiscum convenire non potuerat.

Magistrá Majá, locútí sumus prímum dé festo musicae antiquae Brightoniense, et postea de libris antiquissimis quae colligebant Robinus atque Dominicus; et post cénam légimus et commentátí sumus Corneli Nepótis Vita Alcibiadis. Quæsívimus et locúti sumus dé famá; nonne similis erat Alcibiádes ac virórum ætátis nostræ dé quibus multa in diurnálibus chartís populáribus scripta sunt? Dé tempóribus Alcibiádis quoque locúti sumus, non modo dé eis quæ scripsit Aristophánes in fábula ‘Ranæ’ appelláta sed etiam de belló inter Athénienses et Lacedæmonios.

Ácta sessiónis Jovis diéí 10 Octóbris 2013

Convénimus in domó publicá The Harcourt Arms hórá 6:30. Cordus, Dominicus et Maja jam aderant cum vénit ultimus Avítus.

Magistró Avító, locútí sumus prímum dé recentibus fériís æstívís, inter quás Dominicus dúxit uxórem; et post cénam légimus et commentátí sumus Galfredí Monumeténsis Historiæ Régum Britanniæ 6,17-7,3 (pp. 115-124), ubi Merlíní prophétia refertur. Dum á Saxonibus in Brittonés illátum geritur bellum, monentibus magís, Brittonum réx Vortigernus juvenem quærit sine patre cujus sanguinis sacrifició fundétur fortissima turris. Merlínus autem, á régiá virgine per virum somnó vísitantem generátus, docet nón sanguine suó effúsó, sed subterráneó stagnó exhaustó cónstáre posse turrim. In stagní fundó inventum írí duós dracónés: album (Saxonés significantem) et rúbeum (Brittonés). Quod portentum interpretátur Merlínus longióre prophétiá lepidó idiómate biblicó relátá.

Locútí sumus etiam dé gladió Caliburnó, dé quó paucissima tamen dícit Monumeténsis. In fíne Dominicus commendávit Dana F. Sutton, An Analytic Bibliography of On-Line Neo-Latin Texts.

Ácta sessiónis Jovis diéí 12 Júlí 2012

Convénimus in solitá popíná Alí-Bábá hórá 6:00. Prímæ advénerant Maja novaque sodális Júlia, quás invénit deinde Avítus majóre quam solet morá.

Á Jácóbó convocátí, quí tamen in Collégí Régí Scholá Æstívá Græcé cum docéret nón potuerat adesse, colloquium júcundissimum habuimus multís dé rébus: prímum, quó melius inter nós cógnóscerémus, Júliæ dé nóbís sodálibusque absentibus rettulimus nónnúlla, eamque dé sé interrogávimus, quam comperimus esse Germánam apud Úniversitátem Bristoliénsem mathématicam et in arithméticam incumbentem, neque eó minus míré Latíné disertam; deinde dé commúnitáte Latíná internátiónálí locútí sumus, necnón dé sémináriís Latínís annís præteritís celebrátís quibus nónnúllís Avítus et Júlia úná interfuerant; exinde dé hominibus Latíné loquendí cupidís in Britanniá; dénique véró dé linguá Latíná docendá atque discendá in scholís et úniversitátibus Britannicís.

Légimus in fíne Crístophorí Columbí, Óceanicæ Classis Præfectí Hispánicæ, prímás litterás, ut tunc putábátur, Dé ínsulís núper in marí Indicó repertís, quás Olisíbóne prídié Ídús Mártiás 1493 pulchrá Hispánitáte cónscríptás in minus bonam Latínitátem verterat Aliander dé Cosco quídam a.d. III. Kalendás Majás. Avítus attulerat Hispánicum archetypum, ubi nónnúlla dubia comprobáre potuimus.

Ácta sessiónis Jovis diéí 12 Jánuárí 2012

Convénimus in solitá popíná Alí-Bábá hórá 6:00. Adfuérunt Astur, Avítus, Canicus, Cordus, Jácóbus, Maja.

Magistró Jácóbó, légimus et commentátí sumus M. Tullí Cicerónis Pró T. Annió Milónis órátiónem, 24-30, ubi Ciceró rés narrat quæ in cædem P. Clódí Pulchrí dié 18º Jánuárí -52 évásérunt. Locútí sumus quoque dé historiá illíus temporis, dé Cicerónis défénsióne, et dé comitiís Rómánís.