Ácta sessiónis Jovis diéí 15 Decembris 2011

Sessiónem extraórdináriam in Aulá lautissimá Templí Medí habuimus, hórá quidem solitá feré 6:00 sed ínsigní occásióne fábulæ quam grex agébat juvenum júrisperítórum «Revels», cujus Cordus est pars. Astur et Avítus cum conjugibus, necnón Cordus atque familia, et Jácóbus, adfuérunt Sáturnálibus celebrandís.

Núllus fuit magister. Á Cordó invítátí, quícum tamen tantum post fábulam colloquí potuimus, Astur atque Avítus cum conjugibus nostrís ejusque familiá, cénam amœnam habuimus inter quam multa tractávimus sed præsertim Asturis magnó omnibus gaudió náscitúrum et futúram omnibus trístem ejusdem in Austráliam profectiónem hác æstáte. Jácóbus vénit dum agitur fábula, post quam etiam cum eó atque ipsó Cordó sermónem conseruimus. Úsus linguæ Latínæ, cum adessent haud loquentés, fuit rárus.

Ácta sessiónis Sólis diéí 14 Júní 2009

Conventum est in caupónam déversórí Chamberlain Hotel hórá 14:00. Adfuérunt Cordus atque Evan.

Evan duce, sermónem fécérunt multís dé rébus: recentibus comitiís Európæís, sessiónum ratióne et sessiónibus prióribus, páginís électronicís, Lúdís Classicís «Iris» prope Tower Bridge, multiplicátióne Latíná, Latínitáte légum Rómánárum antíquárum, múnere futúró Evantis ut júdicis in tribúnálí. Úná feré post hórá domum petiérunt.

Ácta sessiónis Jovis diéí 22 Septembris 2005

Convénimus in solitá domó publicá The Lamb hórá 6:00. Prímí advénérunt Simó atque Hieremias, quós Avítus quá solet morá invénit. Cordus Oxóniá vectus tertius fuit.

Post tam longam æstátem incépit colloquium á peregrinátiónibus: alií enim Parisiós, alií Corsicam Sardiniamque, alií Rómam atque Scandináviam petiérant. Locútí sumus etiam dé músicá chorálí músicísque ínstrúmentís, et dé ARLT Scholá Æstívá cuj Avítus loquendí magister interfuit. Mox jamque inter cénam ad júris prúdentiam dérívávit sermó, cui hóc annó Cordus incipit studére, et ad distantiam inter ‘barristers’ (advocátós) et merós ‘solicitors’ (prócúrátórés) quam Avítus numquam intellexerat sed nunc oblátó nómine Latínó perspicué patuit.

Ácta sessiónis Mercurí diéí 26 Novembris 2003

Convénimus in solitá domó publicá The Lamb hórá 6:00. Cénávimus, bibimus. Hieremias dé itinere in Andalusiam suó nóbís narrávit, Simon dé fílió Jácóbó, duodecim annós nátó, quí linguam Latínam hóc annó discere cœpit, Avítus dé labóribus suís cum Matríténsí Txemusque ut incipiat tandem múnere fungí suó «Societás Circulórum Latínórum».

Collocútí sumus deinde multum dé júribus eórumque studió comparátívó, dé antíquó júre Babilónicó (urbánó), Júdaicó (rúrálí), Islamicó (nomadicó). Docuérunt ambó multum Avítum dé verbís ad júra pertinentibus et æquivalentiís inter ínstitúta Rómánórum et nostra, ut Rómánórum societátés nón fuerint nostræ ‘companies’ sed ‘partnerships’, nam nón esse límitátá respónsábilitáte, quam expedientissimam rem inventam esse multó recentius ad condendás magnás societátés ferroviáriás; nostrás enim societátés, síve ‘private limited companies (Ltd)’, quod ‘sociedades limitadas’ Hispání appellant, síve ‘public limited companies (plc)’, quod ‘sociedades anónimas’, límitátá esse respónsábilitáte.

Dé fideí commissís (‘trusts’) quoque disseruimus, et dé litterís patentibus (‘patents’), quás ólim régés dábant.