Ácta sessiónis Lúnæ diéí 7 Mártí 2016

Convénimus dié Lúnæ 7 Mártí 2016 in domó publicó ‘Truckles of Pied Bull Yard’ in Bury Place horá 18:30.  Adfuimus Canicus, Cordus, Joccus, Maja, Márcus S, Márcus T; in fíne sessiónis advénit etiam Johanna amíca Joccí (quæ Latíné nón loquitur sed linguam intellegit).

Dum cénábámus, Cordus magister computátríce suá nónnullás pelliculás Latínás mónstrávit:

Hís dé pelliculís collocútí sumus et dé necessitáte pelliculárum librórum carminum Latínum júcundórum ut hominés Latíné loquí nón tantum possint sed etiam velint.  Mentiónem fécérunt sodálés nónnullórum librórum carminumque modernórum Latíné versórum, nempe:

In fíne paucum diximus dé sessiónibus futúrís.  Proxima dié 11 Aprílis erit, magistró Márcó S.

Ácta sessiónis Jovis diéí 13 Mártí 2014 magistrá Majá

Convénimus dié Jovis 13 Martis 2014 in domó publicó ‘Truckles of Pied Bull Yard’ in Bury Place horá 18.30. Advénerunt primi Maja Canicusque, et postea Robinus, Dominicus atque Jacóbus. Cordus ultimó momentó propter labórem advenire non potuit et se excusávit. Dum cenámus, magistrá Majá, légimus atque discutimus caput xxviii ‘Vitae Sancti Columbæ’ in quo de bestiá aquatíli lacús Nesiani scripsit Adamnan, et postea versús illos Libri V ‘De Rerum Naturá’ Titi Lucreti Cari in quibus Lucretius de Chimaerá Centauribusque scripsit, et in quo explicávit cur non fieri potuissent. De carmine quoque Lactanti ‘De Ave Phoenice’ paulisper collocúti sumus. Dominicus libros aliquos de dracónibus apportaverat, quos inspeximus.

Ácta sessiónis Jovis diéí 9 Augustí 2012

Convénimus in solitá popíná Alí-Bábá hórá 6:30. Príma advénerat Francisca, quam Maja et pauló post Jácóbus et dénique Avítus invénit ibi. Morá quádam vénit etiam Hugó, quem bicyclum déstituerat.

Magistró Avító, æstívá hác sessióne locútí sumus prímum dé fériís déque annó proximó. Maja Aprílí fériás habuerat. Jácóbus aliquot diés núperius égerat rúrí in tabernáculó. Francisca amícós víserat. Avítus nóndum vacáverat, sed cónstituerat jam Frísingam (Monacum) petere ut 26ª Septimáná Latíná Európæá (2-8 Sep) adesset. Commendáta est quoque Schola Latína Úniversális, quæ initium faciet nóní ejus vítæ anní académicí proximó 17 Septembris 2012. Locútí sumus etiam dé Féstó Músicæ Antíquæ Brighton ménsibus Octóbre Novembre habendó, ubi Maja nostra canet. Longum colloquium habuimus posteá dé somniís, hujus sessiónis máteriá. Disseruimus dé rhythmís circádiánís et dé úníuscujusque maximé assiduís somniís, sententiís nostrís super eórum significátióne, necnón artibus quó melius memoriá tenérentur vel etiam cónscientia fovérétur dum somniátur, somniís lúcidís et pelliculá Inception.

Post cénam légimus et commentátí sumus Aur. Macrobí Ambrosí Theodosí Commentárí ex Ciceróne in somnium Scípiónis librum prímum, caput tertium, quó auctor autumat «Quínque esse genera somniandí, atque somnium hoc Scípiónis ad príma tria genera débére referrí». Macrobí cónfúsa genera déclárávimus: somnium, óráculum, vísiónem, ínsomnium, [ephialtam,] vísum. Multa didicimus etiam dé ipsíus Cicerónis narrátióne (Rép. 6,8-29), necnón dé Platónis fábulá Éris (R. 10,614a-621d). In fíne vídimus in télevísióne certámen cursús quó Usain Bolt aurum vícit in 200 metrís in Olympiís, bonóque discessimus animó.