Dé Bacchanálibus, júris nátúrá, Oxóniénsibus rébus: ácta sessiónis Septembris 2017

Edmundus, Maria, Fergus, Guenevera, Maja
Edmundus, Maria, Fergus, Guenevera, Maja

Dié Mártis convénimus 12 Septembris 2017 hórá 18:30 in caupóná ‘Truckles’ in Bury Place.  Adfuimus Cordus, Edmundus, Fergus, Guenevera, Maja, Maria.

senátús cónsultó dé Bacchanálibus disseruimus, Cordó magistró.  Orthographiam priscam oculó ínsolitam cénsuimus, vóce tamen facile legí.  Præcepta contrá Bacchanálés nóbís similia vísa sunt legum dé tromocratiá sive terrorismó in ætáte nostrá.  Locútí sumus dé nátúrá júris legumque, utrum imperia sunt potentium hominum an jústitiæ prónuntiáta nátúrális.

Quod inter nós noví fuérunt sodálés, diximus quí sumus, quómodó et quáré Latíné loquí didicimus; quod hí noví Oxóniénsés erant, dé collégiís úniversitátis Oxóniénsis locútí sumus Circulóque Latínó Oxóniénsí. Ceterum amícitiás Latínás, scholam Latínam Corcagiénsem, gregem músicálem ‘Tyrtarion’, Académíam ‘Vivárium Novum’ disseruimus.

Ácta sessiónis Lúnæ diéí 12 Octóbris 2015 magistró Márcó T

Convénimus dié Lunæ 12 Octóbris 2015 in domó publicó ‘Truckles of Pied Bull Yard’ in Bury Place horá 18.30.  Advénérunt Maja, Cordus, Márcus S, Márcus T. Avítus, Canicus, Davidus, Jacóbus, Juliána et Robínus anteá sé excusávérant.

Marcó T magistró, légimus et discussimus scænam é fábulá ‘Amphitruo’ á Plautí scriptá, in quá Sósia, servus Amphitruónis, obviam it Mercúrió, quí sibi adhibuit Sósiæ fórmam (ut fórmam Amphitruónis sibi adhibuerat Juppiter).  Dé arte scriptóris comœdiórum égimus, et Cordus explicávit sé comœdiás brevés scríbere solére quás agant júriscónsultí ménse Decembris.

Proxima sessió erit dié Lúnæ 9 Novembris, magistró nóndum cónstitútó, dé quá plúra publicé et in sitú et per epistulás électronicás vel á Majá vel á Márcó T nuntiábuntur.

Ácta sessiónis Jovis diéí 26 Februárí 2004

Convénimus in solitá domó publicá The Lamb hórá 6:00. Cénávimus, bibimus. Collocútí sumus dé religióne Mithraicá linguáque antíquá Persicá; dé linguá Sanscriticá, quam Hieremias noster nunc discit; dé futúrís fériáticís peregrínátiónibus; dé Avítí labóre; dé familiís nostrís.

Ut solet fierí, quidam prope assídéns juvenis mírátus rogávit num colloquerémur Latíné. Patuit enim posteá ipsum philologiæ Græco-Latínæ Oxóniæ, in Collégió Exóniénsí, studuisse, quamquam nunc in rébus Arabicís versárétur. Quó compertó, polymathés noster Simon cum eó Arabicé paululum disseruit magná sollertiá, mírantibus invicem nóbís.

Dénique collocútí sumus dé Andriá Terentí, nam cónstituerámus prímum ejus fábulæ áctum domí prælegere, et per conventum uná retractáre. Quod magná délectátióne et émolumentó fécimus.