Ácta sessiónis Jovis diéí 12 Septembris 2013

Convénimus in domó publicá The Harcourt Arms hórá 6:30. Maja, Jácóbus, Canicus et á Calédoniá Avítí amící duo vénérunt. Avítus ipse ultimó mómentó veníre nón potuit.

Magistró Jácóbó, fábulam dé Orpheó Eurydicéque légimus ab Ovidió scríptam (Met. 10,1-85) in quá Orpheus uxórem Eurydicem á Plútóne petívit. Dé trístitiá Orpheí locútí sumus et dé fortitúdine ejus cum ad ínferós déscendit.

Ácta sessiónis Jovis diéí 9 Mají 2013

Convénimus in domó publicá The Harcourt Arms, hórá 6:30. Adfuérunt Canicus, Jácóbus, Maja. Robertus quoque iterum vénit, magnóque cum gaudió accépimus sodálem novam, Chrístínam, a Jácóbó invítátam.

Magistrá Majá, postquam cénávimus et dé multís variísque rébus júcundissimé locútí sumus, légimus Q. Horátí Flaccí Sermónum 2,6. Disputávimus num temporibus nostrís víta rústica eadem ac temporibus Rómánórum esset. Quæstió nóbís in mentem vénit num víta rústica nunc melior sit quam víta urbána. Cónstábat inter omnés vítam rústicam nunc juvenibus núlló modó semper placére. Multís dé aliís rébus locútí sumus, inter quæ dé medicíná et dé linguá Latíná temporum mediæválium.

Ácta sessiónis Jovis diéí 11 Aprílis 2013

Convénimus in domó publicá The Harcourt Arms hórá 6:30. Adfuérunt Anna, Avítus, Dawna, Jácóbus, Maja. Etiam duás novás sodálés magnó cum gaudió accépimus, Carolottam et Ráchélem, quæ in úniversitátem annó proximó ingredientur.

Magistró Jácóbó, locútí sumus inter alia dé nová Expositióne Pompejáná in Múséó Britannicó. Posteá cénávimus et dé Sermóne quíntó librí prímí Q. Horátí Flaccí collocútí sumus. Mírátí sumus, exemplí grátiá, difficultátés itineris in Sermóne dépictás: meditátí sumus aquam déterrimam, cúlínam quæ ársit, rixam inter viátórés, et návem frequentissimam. Locútí sumus quoque dé vócibus animálium et de ænigmatibus quibusdam Sermónis.

Ácta sessiónis Jovis diéí 11 Octóbris 2012

Convénimus in solitá popíná Alí-Bábá hórá 6:30. Adfuérunt Avítus, Canicus, Maja, iterumque jam Júlia.

Á magistró désignátó dérelictí, prímum dé commúnitáte Latíná internátiónálí locútí sumus, necnón dé 26ª Septimáná Latíná Európæá (2-8 Sep) Frísingæ (prope Monacum) habitá, ubi Avítus nónnúllós Júliæ amícós víderat; deinde légimus et commentátí sumus P. Vergilí Marónis Ænéidis I, 76-127, ubi poéta procellam narrat quam Æolus Júnóní páréns solvit commótusque Neptúnus sentit.

Ácta sessiónis Jovis diéí 13 Septembris 2012

Convénimus in solitá popíná Alí-Bábá hórá 6:30. Adfuérunt Canicus, Jácóbus, Joccus, Maja.

Magistró Canicó, légimus et commentátí sumus P. Vergilí Marónis Ænéidis I, 1-49, ubi poéta deæ sævam in Ænéam suósque narrat Júnónis íram, ejusdemque frústrá cónátús né á Trojá perditá profugí in Latium perveniant condantque Rómam.

Jácóbum ob nuptiás núper celebrátás congrátulátí sumus. Joccó in patriam Finniam mox reditúró tríste valé díximus.

Ácta sessiónis Jovis diéí 14 Júní 2012

Sessiónem extraórdináriam in Græcá popíná Konaki prope Múséum Britannicum habuimus, hórá quidem nón ínsolitá 6:30, ut ultimam sessiónem cénamque valédictóriam celebrárémus cum Asture, in Austráliam proximís diébus migrátúró. Adfuérunt Astur, Avítus, Canicus, Cordus, Joccus, Maja.

Magistrá Majá, vóta nostra in chartulá scrípserámus quam Asturí trádidimus, ubi inerant etiam Jácóbí vóta, quí adesse nón poterat sed électronicé míserat. Inter optimam cénam colloquiumque spontáneum, dé Asturis fílió prímigenió núperrimé nátó lætí audívimus, phótographiamque ejus vídimus. Post cénam epistulás duás brevés á Désíderió Erásmó Roterodámó scríptás ínspeximus: XXVII, dé Londiniénsí ingrátó; atque XXVIII, dé ínsalúbribus ædificiís Anglicánís (quæ, numeró autem XXI, invenátur quoque apud G. S. Facer, Erasmus and his Times, Bolchazy-Carducci 1951). Sessió itaque et trístis et hilara fuit.

Ácta sessiónis Jovis diéí 10 Mají 2012

Convénimus in popíná Mumtáz hórá 6:00. Adfuérunt Canicus et Maja.

Á magistró désignátó dérelictí, légimus ac retractávimus T. Lucrétí Cárí Dé rérum nátúrá librum prímum, versús 62 ad 101 (‘Húmána ante oculós fœdé cum víta jacéret … tantum religió potuit suádére malórum‘), quibus poéta dé impiís religiónis sceleribus scríbit et dé salútárí victóriá scientiæ. Cum Maja tam multum dé Lucrétió sciat, duás feré hórás conversátiónis égimus perjúcundás.

Ácta sessiónis Jovis diéí 15 Mártí 2012

Sessiónem quádantenus extraórdináriam in Collégió Úniversitátis Londiniénsis habuimus, hórá quidem nón ínsolitá 6:30 sed in aulá quam Avítus nóbís reserváverat ut pelliculás quásdam spectáre possémus. Avítus vénerat prímus ut omnia paráret, cuj supervénit mox Cordus. Dum technicus arcessitur (ínstrúmenta enim —ut fit— respondére initió nólle vidébantur) advénit etiam Maja. Pauló post Astur.

Magistró Avító, spectávimus prímum nónnúllás scænás á CLL sessióne Mártis diéí 27 Septembris 2011, atque exinde colloquium (Anglicum) cum Avító de linguá Latíná ejusque úsú vívó. Posteá nós convertimus ad P. Vergilí Marónis Ænéidis VI, 442-476, ubi Ænénás, apud ínferós, in lúgentibus campís videt amóre quí perierunt, quem locum légimus juxtá commentárium P. Virgilii Maronis Æneidos, libri sex priores: argumentis, explicationibus et notis illustrata [sic]. à Ioanne Ludovico de la Cerda, Toletano, è Societate Iesu. Coloniæ Agrippinæ. Apud Ioannem Kinchium sub Monocerote, Anno 1642. Permissu Superiorum, & Privil[egio = ©] S[uæ] Cæs[areæ] Maiest[atis, nempe Ferdinandi III], et scílicet ad librum sextum ejusque versús 442ss (quós tamen Kinchius perperam numerat). Disputátió ad Homérum ætátemque aéneam longé nós abdúxit. Dé æstáte cónsiliísque æstívís délíberáre quoque voluerámus, sí forte placéret an possémus iter úná facere extrá ínsulam, ut amícitiás plúrimás júcundissimásque Latínás per tótum orbem conjungerémus; sed nón multum prófécimus. Post duárum hórárum sessiónem discessimus.

Ácta sessiónis Jovis diéí 12 Jánuárí 2012

Convénimus in solitá popíná Alí-Bábá hórá 6:00. Adfuérunt Astur, Avítus, Canicus, Cordus, Jácóbus, Maja.

Magistró Jácóbó, légimus et commentátí sumus M. Tullí Cicerónis Pró T. Annió Milónis órátiónem, 24-30, ubi Ciceró rés narrat quæ in cædem P. Clódí Pulchrí dié 18º Jánuárí -52 évásérunt. Locútí sumus quoque dé historiá illíus temporis, dé Cicerónis défénsióne, et dé comitiís Rómánís.

Ácta sessiónis Jovis diéí 10 Novembris 2011

Convénimus in solitá popíná Alí-Bábá hórá 6:00. Canicus prímus vénit, quem invénérunt mox Avítus cum nová sodále Franciscá.

Magistró Canicó, prímum dé Franciscá ejusque studiís scíscitátí sumus, et deinde légimus ac retractávimus M. Tullí Cicerónis, Dé officiís, III, 58-60, fábulam Syrácúsání argentárí Pýthí equitisque Rómání C. Caní, quí víllam emit immemor sententiæ «caveat émptor»!