Ácta sessiónis Jovis diéí 12 Júní 2014 magistró Jácóbó

Sessiónem extraórdináriam in Turcicá popíná Tas prope Múséum Britannicum habuimus, hórá quidem nón ínsolitá 6:30, ut ultimam sessiónem cénamque valédictóriam celebrárémus cum Avító, in Indiam proximó ménse migrátúró. Adfuérunt Avítus, Cordus, Jácóbus, Maja.

Magistró Jácóbó, vóta nostra in chartulá scrípserámus quam Avító trádidimus, ubi inerant etiam Canicí vóta, quí adesse nón poterat sed per Majam míserat. Inter optimam cénam colloquiumque spontáneum, locútí sumus dé præsentí atque futúró Latínæ doctrínæ in Britanniá, dé Melissá, dé Scholá Latíná Európæá & Úniversálí et dé methodís linguæ Latínæ; inde inquísívimus dé linguá litterísque Indicís déque Avítí própositís futúrís. Sessió itaque et trístis et hilara fuit.

Ácta sessiónis Jovis diéí 11 Aprílis 2013

Convénimus in domó publicá The Harcourt Arms hórá 6:30. Adfuérunt Anna, Avítus, Dawna, Jácóbus, Maja. Etiam duás novás sodálés magnó cum gaudió accépimus, Carolottam et Ráchélem, quæ in úniversitátem annó proximó ingredientur.

Magistró Jácóbó, locútí sumus inter alia dé nová Expositióne Pompejáná in Múséó Britannicó. Posteá cénávimus et dé Sermóne quíntó librí prímí Q. Horátí Flaccí collocútí sumus. Mírátí sumus, exemplí grátiá, difficultátés itineris in Sermóne dépictás: meditátí sumus aquam déterrimam, cúlínam quæ ársit, rixam inter viátórés, et návem frequentissimam. Locútí sumus quoque dé vócibus animálium et de ænigmatibus quibusdam Sermónis.

Ácta sessiónis Jovis diéí 9 Augustí 2012

Convénimus in solitá popíná Alí-Bábá hórá 6:30. Príma advénerat Francisca, quam Maja et pauló post Jácóbus et dénique Avítus invénit ibi. Morá quádam vénit etiam Hugó, quem bicyclum déstituerat.

Magistró Avító, æstívá hác sessióne locútí sumus prímum dé fériís déque annó proximó. Maja Aprílí fériás habuerat. Jácóbus aliquot diés núperius égerat rúrí in tabernáculó. Francisca amícós víserat. Avítus nóndum vacáverat, sed cónstituerat jam Frísingam (Monacum) petere ut 26ª Septimáná Latíná Európæá (2-8 Sep) adesset. Commendáta est quoque Schola Latína Úniversális, quæ initium faciet nóní ejus vítæ anní académicí proximó 17 Septembris 2012. Locútí sumus etiam dé Féstó Músicæ Antíquæ Brighton ménsibus Octóbre Novembre habendó, ubi Maja nostra canet. Longum colloquium habuimus posteá dé somniís, hujus sessiónis máteriá. Disseruimus dé rhythmís circádiánís et dé úníuscujusque maximé assiduís somniís, sententiís nostrís super eórum significátióne, necnón artibus quó melius memoriá tenérentur vel etiam cónscientia fovérétur dum somniátur, somniís lúcidís et pelliculá Inception.

Post cénam légimus et commentátí sumus Aur. Macrobí Ambrosí Theodosí Commentárí ex Ciceróne in somnium Scípiónis librum prímum, caput tertium, quó auctor autumat «Quínque esse genera somniandí, atque somnium hoc Scípiónis ad príma tria genera débére referrí». Macrobí cónfúsa genera déclárávimus: somnium, óráculum, vísiónem, ínsomnium, [ephialtam,] vísum. Multa didicimus etiam dé ipsíus Cicerónis narrátióne (Rép. 6,8-29), necnón dé Platónis fábulá Éris (R. 10,614a-621d). In fíne vídimus in télevísióne certámen cursús quó Usain Bolt aurum vícit in 200 metrís in Olympiís, bonóque discessimus animó.

Ácta sessiónis Jovis diéí 12 Júlí 2012

Convénimus in solitá popíná Alí-Bábá hórá 6:00. Prímæ advénerant Maja novaque sodális Júlia, quás invénit deinde Avítus majóre quam solet morá.

Á Jácóbó convocátí, quí tamen in Collégí Régí Scholá Æstívá Græcé cum docéret nón potuerat adesse, colloquium júcundissimum habuimus multís dé rébus: prímum, quó melius inter nós cógnóscerémus, Júliæ dé nóbís sodálibusque absentibus rettulimus nónnúlla, eamque dé sé interrogávimus, quam comperimus esse Germánam apud Úniversitátem Bristoliénsem mathématicam et in arithméticam incumbentem, neque eó minus míré Latíné disertam; deinde dé commúnitáte Latíná internátiónálí locútí sumus, necnón dé sémináriís Latínís annís præteritís celebrátís quibus nónnúllís Avítus et Júlia úná interfuerant; exinde dé hominibus Latíné loquendí cupidís in Britanniá; dénique véró dé linguá Latíná docendá atque discendá in scholís et úniversitátibus Britannicís.

Légimus in fíne Crístophorí Columbí, Óceanicæ Classis Præfectí Hispánicæ, prímás litterás, ut tunc putábátur, Dé ínsulís núper in marí Indicó repertís, quás Olisíbóne prídié Ídús Mártiás 1493 pulchrá Hispánitáte cónscríptás in minus bonam Latínitátem verterat Aliander dé Cosco quídam a.d. III. Kalendás Majás. Avítus attulerat Hispánicum archetypum, ubi nónnúlla dubia comprobáre potuimus.

Ácta sessiónis Jovis diéí 15 Mártí 2012

Sessiónem quádantenus extraórdináriam in Collégió Úniversitátis Londiniénsis habuimus, hórá quidem nón ínsolitá 6:30 sed in aulá quam Avítus nóbís reserváverat ut pelliculás quásdam spectáre possémus. Avítus vénerat prímus ut omnia paráret, cuj supervénit mox Cordus. Dum technicus arcessitur (ínstrúmenta enim —ut fit— respondére initió nólle vidébantur) advénit etiam Maja. Pauló post Astur.

Magistró Avító, spectávimus prímum nónnúllás scænás á CLL sessióne Mártis diéí 27 Septembris 2011, atque exinde colloquium (Anglicum) cum Avító de linguá Latíná ejusque úsú vívó. Posteá nós convertimus ad P. Vergilí Marónis Ænéidis VI, 442-476, ubi Ænénás, apud ínferós, in lúgentibus campís videt amóre quí perierunt, quem locum légimus juxtá commentárium P. Virgilii Maronis Æneidos, libri sex priores: argumentis, explicationibus et notis illustrata [sic]. à Ioanne Ludovico de la Cerda, Toletano, è Societate Iesu. Coloniæ Agrippinæ. Apud Ioannem Kinchium sub Monocerote, Anno 1642. Permissu Superiorum, & Privil[egio = ©] S[uæ] Cæs[areæ] Maiest[atis, nempe Ferdinandi III], et scílicet ad librum sextum ejusque versús 442ss (quós tamen Kinchius perperam numerat). Disputátió ad Homérum ætátemque aéneam longé nós abdúxit. Dé æstáte cónsiliísque æstívís délíberáre quoque voluerámus, sí forte placéret an possémus iter úná facere extrá ínsulam, ut amícitiás plúrimás júcundissimásque Latínás per tótum orbem conjungerémus; sed nón multum prófécimus. Post duárum hórárum sessiónem discessimus.

Ácta sessiónis Jovis diéí 22 Septembris 2005

Convénimus in solitá domó publicá The Lamb hórá 6:00. Prímí advénérunt Simó atque Hieremias, quós Avítus quá solet morá invénit. Cordus Oxóniá vectus tertius fuit.

Post tam longam æstátem incépit colloquium á peregrinátiónibus: alií enim Parisiós, alií Corsicam Sardiniamque, alií Rómam atque Scandináviam petiérant. Locútí sumus etiam dé músicá chorálí músicísque ínstrúmentís, et dé ARLT Scholá Æstívá cuj Avítus loquendí magister interfuit. Mox jamque inter cénam ad júris prúdentiam dérívávit sermó, cui hóc annó Cordus incipit studére, et ad distantiam inter ‘barristers’ (advocátós) et merós ‘solicitors’ (prócúrátórés) quam Avítus numquam intellexerat sed nunc oblátó nómine Latínó perspicué patuit.

Ácta sessiónis diéí Jovis 2 Júní 2005

Convénimus in solitá domó publicá The Lamb hórá 6:00. Prímus advénit Hieremias, quem Avítus sémihóræ morá invénit. Cordus tertius fuit. Némó alius potuit adesse.

Júcundissimum colloquium habuimus multís dé rébus: nón sólum dé peregrínátiónibus nostrís aliísque solitís, sed etiam dé líbertáte ejusque obstáculís, dé summó bonó, dé Únióne Európæá et própositá cónstitútióne, dé arte cinematographicá atque histrióne Peter Sellers ejusque pelliculís, dé júris prúdentiá Rómáná, dé librís quós nónnullí nostrí scríbere meditámur, dé sémináriís æstívís Latínís, dénique —ut dícunt Anglí— dé brassicís et régibus.

Post optimam nec minus multís condítam colloquiís cénam valé diximus.

Ácta sessiónis Jovis diéí 5 Májí 2005

Post multós ménsés silentió peractós dénuó convénimus in solitá domó publicá The Lamb hórá 6:00. Avidissimus Latíné loquendí Avítus prímus vénit, nec longé post Lívia. Colloquentés invénit Simon, quócum cónsédimus in áreolá sub dívó. Mox advénit et Hieremias.

Multís dé rébus locútí sumus: dé itineribus nostrís præteritís futúrísque, Avítus enim Hafniam modo vísitáverat atque Simon jam æstíva itinera præparabat; dé amóribus Hieremiæ; dé studiís Líviæ; dé condicióne linguæ Latínæ in Európá; dé numeró hominum quí Latíné loquuntur; dé libró dénique Empires of the Word: A Language History of the World (HarperCollins), quem Simon noster legébat, á Nicholas Ostler scriptó, réctóre, nisí fallimur, societátis Foundation for Endangered Languages, quócum Avítus commercium epistuláre dúdum habére cónátus est frústrá. Post aliquid temporis intus —jam enim algébámus— optimam nec minus loquácem cénam habuimus.

Anteá quidem débuérunt proficíscí Simon et Hieremias quam adveníret tandem Oxóniá hórá nóná Cordus. Quó salútátó etiam Lívia, amíca ipsius, abíre débuit. Mánsit autem Avítus colloquiumque adhúc duárum feré hórárum habuérunt dé rébus políticís aliísque multís.

Ácta sessiónis Jovis diéí 7 Octóbris 2004

Convénimus in solitá domó publicá The Lamb hórá 6:00. Avítus, præter cónsuétúdinem, nullá pervénit morá; Simónem nihilóminus sedentem jamque expectantem invénit, quócum dé fílió ejus ínstituit colloquium, breví togam virílem sumptúró. Mox advénit etiam Hieremias, quí fériás suás iterque Græcum narrávit. Tandem Cordus, quem prióre conventú cognóverámus, cum amícá suá Líviá, magnó omnium gaudió nóbís interfuérunt.

Locútí sumus dé studiís novórum nostrum amícórum, et dé vítá eórum Oxóniæ, quam in návigió fluviátilí dégunt; dé prónúntiátú Latínó; dé sémináriís Latínís æstívís. Céna fuit nóbís júcunda commúnis.

Ácta sessiónis Jovis diéí 26 Februárí 2004

Convénimus in solitá domó publicá The Lamb hórá 6:00. Cénávimus, bibimus. Collocútí sumus dé religióne Mithraicá linguáque antíquá Persicá; dé linguá Sanscriticá, quam Hieremias noster nunc discit; dé futúrís fériáticís peregrínátiónibus; dé Avítí labóre; dé familiís nostrís.

Ut solet fierí, quidam prope assídéns juvenis mírátus rogávit num colloquerémur Latíné. Patuit enim posteá ipsum philologiæ Græco-Latínæ Oxóniæ, in Collégió Exóniénsí, studuisse, quamquam nunc in rébus Arabicís versárétur. Quó compertó, polymathés noster Simon cum eó Arabicé paululum disseruit magná sollertiá, mírantibus invicem nóbís.

Dénique collocútí sumus dé Andriá Terentí, nam cónstituerámus prímum ejus fábulæ áctum domí prælegere, et per conventum uná retractáre. Quod magná délectátióne et émolumentó fécimus.