Ácta sessiónis Mártis diéí 7 Mártí 2017

Convénimus dié Mártis 7 Martií 2017 in domó publicó ‘Truckles of Pied Bull Yard’ in Bury Place hórá 18.30.  Læté ad cubiculum nostrum solitum ‘Boardroom’ regressi sumus!  Advénérunt Maja, Cordus, Avítus, Márcus, Rachel et cónsodális novus Olívárius, quem læté accépimus.  Márcó magistró, légimus et discussimus epistulás duás (V et CV) á Senecá Minóre scriptás, necnón præcepta quædam Márcí Aurélií, quæ próposuerat Rachel.  Proxima sessió erit dié Mártis 4 Aprílis, magistró Avitó, dé quá plúra publicé et in sitú et per epistulás électronicás nuntiábuntur.

Ácta sessiónis Jovis dieí 12 Decembris 2013 magistró Jácóbó

In caupone ‘Harcourt Arms’ primum convenimus Jacobus et Maja. Diu mansimus alios fortasse exspectantes; caupona plena erat et difficile auditu erat. Alibi igitur cenavimus atque legimus fabulas quattuor a Phædro scriptas et de moralibus locuti sumus. De concepto naturae et de fortuna in fabulis etiam locuti sumus et de relationibus cum aliis fabulis Æsopi.

Ácta sessiónis Jovis diéí 10 Novembris 2011

Convénimus in solitá popíná Alí-Bábá hórá 6:00. Canicus prímus vénit, quem invénérunt mox Avítus cum nová sodále Franciscá.

Magistró Canicó, prímum dé Franciscá ejusque studiís scíscitátí sumus, et deinde légimus ac retractávimus M. Tullí Cicerónis, Dé officiís, III, 58-60, fábulam Syrácúsání argentárí Pýthí equitisque Rómání C. Caní, quí víllam emit immemor sententiæ «caveat émptor»!

Ácta sessiónis Lúnæ diéí 19 Jánuárí 2009

Convénimus in solitá domó publicá The Lamb hórá 6:00. Adfuérunt Astur, Avítus, Cordus, Evan, Hieremias, Jácóbus et Jonathan.

Magistró Hieremiá, légimus ac retractávimus T. Lucrétí Cárí Dé rérum nátúrá librum quartum, versús 962 ad 1208, quibus poéta dé mente (“animó” et “animá”) fúsius scríbit (vid. vv. 722ss), necnón dé somnó (vv. 962ss), et dé amóre atque Eróte (1037ss). Dé Epicúréórum Stóicórumque philosophiá quoque disceptávimus.

Ácta sessiónis diéí Jovis 2 Júní 2005

Convénimus in solitá domó publicá The Lamb hórá 6:00. Prímus advénit Hieremias, quem Avítus sémihóræ morá invénit. Cordus tertius fuit. Némó alius potuit adesse.

Júcundissimum colloquium habuimus multís dé rébus: nón sólum dé peregrínátiónibus nostrís aliísque solitís, sed etiam dé líbertáte ejusque obstáculís, dé summó bonó, dé Únióne Európæá et própositá cónstitútióne, dé arte cinematographicá atque histrióne Peter Sellers ejusque pelliculís, dé júris prúdentiá Rómáná, dé librís quós nónnullí nostrí scríbere meditámur, dé sémináriís æstívís Latínís, dénique —ut dícunt Anglí— dé brassicís et régibus.

Post optimam nec minus multís condítam colloquiís cénam valé diximus.