Dé Hungariá Sáturnálibusque: ácta sessiónis Decembris 2017

Convénimus dié Lúnæ 11 Dec in locó solitó Truckles hórá 18.45 (quia mora erat Metropolitánæ in agmine) Maja, Márcus S, Avítus et cónsodális nova Christína, quam læte accépimus. Christína Londinium nuperrime ex Hungariá advénit ad doctorandum. Cordus et cónsodálés noví Márcus D et Matthæus anteá sé excusávérant.

Magistrá Majá, dum cénámus dé vítá nostrá et dé Latínitáte in Hungariá loquebámur. Salútátiónibus Sáturnáliciís dátís acceptísque, domum omnés redierunt.

Proxima sessió erit dié Lúnæ 15 Jánuárií 2018 (2771 A.U.C.), dé quá plúra publicé et híc in sitú et per epistulás électronicás nuntiabuntur. Magister nóndum cónstitútus est.

Ió Sáturnália!

Dé Bacchanálibus, júris nátúrá, Oxóniénsibus rébus: ácta sessiónis Septembris 2017

Edmundus, Maria, Fergus, Guenevera, Maja
Edmundus, Maria, Fergus, Guenevera, Maja

Dié Mártis convénimus 12 Septembris 2017 hórá 18:30 in caupóná ‘Truckles’ in Bury Place.  Adfuimus Cordus, Edmundus, Fergus, Guenevera, Maja, Maria.

senátús cónsultó dé Bacchanálibus disseruimus, Cordó magistró.  Orthographiam priscam oculó ínsolitam cénsuimus, vóce tamen facile legí.  Præcepta contrá Bacchanálés nóbís similia vísa sunt legum dé tromocratiá sive terrorismó in ætáte nostrá.  Locútí sumus dé nátúrá júris legumque, utrum imperia sunt potentium hominum an jústitiæ prónuntiáta nátúrális.

Quod inter nós noví fuérunt sodálés, diximus quí sumus, quómodó et quáré Latíné loquí didicimus; quod hí noví Oxóniénsés erant, dé collégiís úniversitátis Oxóniénsis locútí sumus Circulóque Latínó Oxóniénsí. Ceterum amícitiás Latínás, scholam Latínam Corcagiénsem, gregem músicálem ‘Tyrtarion’, Académíam ‘Vivárium Novum’ disseruimus.